Erdo‘g‘on Netanyaxuni G‘azo sektorining “qassobi” deb atadi
Turkiya prezidenti Rajab Toyyib Erdo‘g‘on Isroil bosh vaziri Binyamin Netanyaxuni G‘azo sektorining “qassobi” deb atadi. Bu haqda Haber Turk xabar berdi.
Turkiya prezidenti Isroil armiyasining Falastin anklaviga uyushtirgan hujumlarini “insoniyat tarixidagi eng xiyonatkor hujum” deb atadi.
“Ularning masjidlari bombardimon qilindi. Maktablari xarobaga aylantirildi. Ular boshpana sifatida foydalangan qochqinlar lagerlari ataylab hujumlar nishoniga aylandi. G‘azodagi birodarlarim insoniyat tarixidagi eng xiyonatkor hujumlarga duchor bo‘ldi.
Ular (Isroil harbiylari) butun insoniyat oldida genotsid qilishdi, odamlarni yoqib yuborishdi va yo‘q qilishdi. 2,3 million kishiga qarshi genotsid amalga oshirildi. G‘azoda hozirgi asrning eng katta vahshiyliklaridan birini sodir etgan Netanyaxu allaqachon G’azo qassobi sifatida o‘z nomini tarixga yozgan”, — dedi Turkiya rahbari.
Erdo‘g‘on Isroil hukumati G‘azo sektoridagi 2,3 million aholiga qarshi “genotsid” sodir etganini aytdi. U Netanyaxuni antisemitizmni qo‘zg‘atishda aybladi. U Isroil rasmiylari qonun oldida javob berishiga va’da berdi.
