Toshkent viloyatidagi maxsus tadbirlarda jinoiy guruh a’zosi bo‘lgan 34 kishi qo‘lga olindi
Toshkent viloyatida Respublikaning boshqa viloyatlari singari o‘tkazilayotgan “Dolzarb 40 kunlik” maxsus profilaktik tadbirlari doirasida 34 kishi qo‘lga olindi, deb xabar berdi viloyat IIBB matbuot xizmati.
Maxsus xizmat va huquq-tartibot idoralari tomonidan o‘tkazilgan reyd tadbirlari davomida 34 nafar jinoiy guruh a’zolari qo‘lga olinib, ularning 11 nafariga nisbatan jinoyat ishi qo‘zg‘atilgan, 23 nafari ma’muriy tartibda qamoqqa olingan
Tadbir davomida ushbu va boshqa shaxslardan noqonuniy ravishda saqlab kelingan 13 dona pnevmatik va ov qurollari, o‘q-dori va elektroshoker, turli hajm va ko‘rinishdagi pichoq, kastet va bitalar olib qo‘yilgan.
Giyohvandlikka qarshi kurash yo'nalishida 50 dan ortiq holatlar fosh etilib, 11 kilo giyohvandlik moddalari va 8 ming 703 dona psixotrop va kuchli taʼsir qiluvchi dori vositalari noqonuniy muomaladan olingan.
Tezkor qidiruv tadbirlarida jinoyat sodir etib, sud va tergov organlaridan yashiringan 64 nafar qidiruvdagi shaxslar ushlangan, 2 nafar bedarak yo‘qolgan fuqaro topilib oilasiga qaytarilgan.
Hozirda maxsus-reyd tadbirlari davom ettirilmoqda.
