Farmatsevtika agentligining “Dok-1 Maks” bo‘yicha sudlanayotgan sobiq rahbariga nisbatan sud tibbiy ekspertizasi tayinlandi
Farmatsevtika tarmog‘ini rivojlantirish agentligining “Dok-1 Maks” siropi bo‘yicha sudlanayotgan sobiq rahbari S.K.ga nisbatan sud tibbiy ekspertizasi tayinlandi. Bu haqda sudning 12-yanvar kuni davom etgan navbatdagi majlisida ma’lum qilindi.
Sudlanuvchining advokati Temur Rahmatov sud hay’atiga iltimosnoma kiritib, S.K.ning tergov davomida qiynoqqa solingani, g‘ayriqonuniy tarzda so‘roq qilinib, ruhiy va jismoniy bosimlarga uchraganini aytdi. Hamda holatni sud tibbiy ekspertizasi orqali aniqlashtirishni iltimos qildi.
Sud ayblanuvchi advokatining bu haqdagi so‘rovini qanoatlantirdi. Va tibbiy ekspertiza 15-yanvar kuni o‘tkazilishini belgiladi. Shuningdek, sud tibbiy ekspertizasi ekspertlariga bir qator savollarga javob topish majburiyatini qo‘ydi.
Sobiq amaldor sudning avvalgi majlisida tergov davomida unga nisbatan ruhiy va jismoniy bosimlar bo‘lganini ma’lum qilgandi.
