Zelenskiy Prigojin samolyotining qulashiga munosabat bildirdi
Ukraina prezidenti Vladimir Zelenskiy “Vagner” rahbari Yevgeniy Prigojinning samolyoti qulab tushganiga munosabat bildirdi. Samolyotda bo‘lgan yo‘lovchilar ro‘yxati orasida Prigojin bor. Bu haqda “RBK-Ukraina” xabar berdi.
Zelenskiy Prigojin samolyoti halokatiga Ukrainaning aloqadorligini rad etdi.
“Ukraina samolyot bo‘yicha gapirganda va dunyo mamlakatlariga murojaat qilganda buni nazarda tutmagan edik, balki qo‘llab-quvvatlovni xohlagandik.
Garchi, ehtimol, bu ham qaysidir ma’noda yordam beradi. Birinchidan, bu holatga bizning hech qanday aloqamiz yo‘q, bu aniq. Aviahalokatga kimning aloqasi borligini hamma tushunadi”, — dedi Zelenskiy.
Prigojin samolyoti halokati haqida nima ma’lum?
23-avgust kuni Rossiyaning Tver viloyatida “Vagner” rahbariga tegishli samolyot halokatga uchradi, uning bortida 10 kishi bo‘lgan. “Rosaviatsiya” samolyot yo‘lovchilari ro‘yxatida Prigojin va uning o‘rinbosari Dmitriy Utkin borligini ma’lum qildi. Rasmiy ravishda, “Vagner” rahbarining o‘limi hali tasdiqlanmagan.
Rossiya davlat ommaviy axborot vositalari qutqaruvchilar samolyotdagi barcha 10 yo‘lovchining jasadini topgani haqida xabar bergan. Shu bilan birga, samolyot havo hujumidan mudofaa tizimi tomonidan yo‘q qilingani, portlatilgani haqida versiyalar bor.
“Rosaviatsiya”ning maxsus tuzilgan komissiyasi samolyotning qulash holati va sabablarini o‘rganishga kirishgan. Mutaxassislar “qora qutilar”dagi yozuvlarni topib, o’rganib chiqishi kerak bo‘ladi.
