Tan olinmagan Tog‘li Qorabog‘ Respublikasi sobiq prezidentlari hibsga olindi

Ozarbayjon davlat xavfsizlik xizmati xodimlari tan olinmagan Tog‘li Qorabog‘ Respublikasining sobiq prezidentlari Arkadiy Gukasyan va Bako Saakyanni qo‘lga oldi. Bu haqda APA xabar berdi.

Ular bilan birga respublika parlamentining sobiq spikeri David Ishxanyan ham hibsga olingan. Ayblanuvchilar ularga nisbatan qo‘zg‘atilgan jinoyat ishlari doirasida Bokuga olib kelingan. Tergov qaysi moddalar bo‘yicha olib borilayotganiga aniqlik kiritilmagan.

Arkadiy Gukasyan tan olinmagan Tog‘li Qorabog‘ Respublikasining ikkinchi prezidenti bo‘lib, uni 1997-yildan 2007-yilgacha boshqargan. Uchinchi prezident Bako Saakyan 2007- yildan 2020-yilgacha ushbu lavozimni egallagan.

• 19-sentyabr kuni Ozarbayjon Tog‘li Qorabog‘da harbiy operatsiya o‘tkazdi, shundan so‘ng tan olinmagan respublika 2024-yil 1-yanvarda o‘z faoliyatini yakunlaganini e’lon qildi. 100 mingdan ortiq etnik armanlar hududni tark etdi.
• 27-sentyabr kuni tan olinmagan respublika hukumatining sobiq rahbari, milliarder Ruben Vardanyan Qorabog‘dan chiqib ketmoqchi bo‘lganida qo‘lga olindi. Ertasi kuni u hibsga olindi va bir qancha jinoiy ayblovlar, jumladan, terrorizmni moliyalashtirish, noqonuniy qurolli guruhlar tuzish va faoliyatida ishtirok etishda ayblandi.