Isroillik vazir G‘azoga atom bombasi tashlashni taklif qildi
G‘azo sektoriga atom bombasi tashlashni taklif qilgan Isroilning meros ishlari vaziri Amixay Eliyaxu lavozimidan chetlatildi. Bu haqda “Interfaks” xabar berdi.
Ma’lum qilinishicha, Eliyaxu hukumat yig'ilishlaridan chetlatilgan, chunki u G‘azo sektoriga atom bombasini tashlashni konflikt rivojlanishida “imkoniyatlardan biri” ekanini aytgan. Isroil bosh vaziri Binyamin Netanyaxu vazirning so‘zlari haqiqatga to‘g‘ri kelmasligi va Isroil armiyasi uchinchi tomonlarga zarar yetkazmaslik uchun “xalqaro huquqning eng yuqori standartlariga muvofiq” harakat qilishini ta’kidlagan.
Muxolifat yetakchisi Yair Lapid Eliyaxuning so‘zlarini “mas’uliyatsiz vazirning hayratlanarli va shokka olib keluvchi bayonoti” deb atagan va keyinchalik vazir lavozimidan chetlatilgani ma’lum bo‘lgan.
Ilgariroq Eliyaxu “Kol Berama” radiostansiyasiga bergan intervyusida sektorga atom bombasini tashlash kerakmi, degan savolga javob berar ekan, yuqorida keltirilgan fikrni aytgani maʼlum bo‘ldi. Bundan tashqari, u G‘azoga har qanday insonparvarlik yordamining qabul qilinishiga rozi emasligini aytib, Isroil “natsistlar”ga insonparvarlik yordamini o‘tkazmasligini va “G’azoda tinch aholi jalb qilmaslik“ degan narsa yo’qligini aytgan.
