HAMAS yetakchisi Isroil bilan yaqin orada sulhga erishishlarini aytdi
HAMAS yetakchisi Ismoil Haniya Isroil bilan o‘t ochishni to‘xtatish bo‘yicha kelishuvga erishishda taraqqiyot borligini aytdi. Bu haqda CNN xabar berdi.
Haniyaning so‘zlariga ko‘ra, kelishuv tafsilotlari yaqin soatlarda oshkor etilishi mumkin.
“HAMAS Qatardagi birodarlar va vositachilarga (sulh bo‘yicha) o‘z munosabatini bildirdi, biz sulh bitimi tuzishga yaqinlashmoqdamiz”, — dedi HAMAS.
Falastin guruhining bayonoti Oq uyning quyidagi bayonotini tasdiqlaydi:
“AQSH Milliy xavfsizlik kengashi vakili Jon Kirbi 20-noyabr kuni HAMAS tomonidan garovga olinganlarni ozod qilish bo‘yicha muzokaralar tugashiga yaqinligini aytdi, biroq potensial kelishuv tafsilotlari haqida gapirishdan bosh tortdi”.
Manbalarning CNN telekanaliga aytishicha, Qatar vositachiligida AQSH, Isroil va HAMAS o‘rtasida bir necha hafta davom etgan muzokaralardan so‘ng, ba’zi garovga olinganlarni ozod qilish va jangovar harakatlarni vaqtinchalik to‘xtatish bo‘yicha kelishuvga erishilishi mumkin.
Al-Arabiya telekanali HAMAS vakiliga tayanib, Qatar vositachi sifatida ish olib borayotgan kelishuv tafsilotlarini yaqin soatlarda oshkor qilishi kerakligini xabar qilmoqda.
