Isroil razvedkasiga HAMAS yetakchilarini ta’qib qilish buyurildi

Isroil razvedka agentligi Mossad Falastinning HAMAS guruhi yetakchilarini ta’qib qilish bo‘yicha buyruq oldi. Bu haqda Isroil bosh vaziri Binyamin Netanyaxuga tayanib, The Jerusalem Post xabar berdi.

“Men Mossadga HAMAS yetakchilariga qarshi ular turgan joyda harakat qilishni buyurdim. Bu qiyin, ammo to‘g‘ri qaror”, — deya Netanyaxu Isroil ularni G‘azodan tashqarida, jumladan, Qatarda ham nishonga olishi mumkinligiga ishora qildi.

U Isroil armiyasi jangovar harakatlardagi pauza vaqtida HAMAS yetakchilarini o‘ldirishga harakat qiladimi yoki u tugagunga qadar o‘z sa’y-harakatlarini to‘xtatadimi, degan savollarni chetlab o‘tdi.

“Biz barcha maqsadlarimizga erishmagunimizcha urush davom etadi: barcha garovga olinganlarni qaytaramiz, HAMASni yo‘q qilamiz va ertasi kuni HAMASni qo‘llab-quvvatlovchi, farzandlarini terrorizm uchun tarbiyalayotgan va terrorchilarga yoki ularning oilalariga maosh to‘layotgan hech bir element G‘azoni nazorat qila olmaydi”, — dedi u.

Netanyaxuning so‘zlariga ko‘ra, G‘azo endi Isroil uchun tahdidga aylanmaydi, sektor janubi va shimolida ham xavfsizlik tiklanadi.