“Ruslar yutqazmaydi”: Vengriya bosh vaziri Ukraina urushda yutmasligini aytdi
Vengriya bosh vaziri Viktor Orban Ukraina Rossiyani jang maydonida mag‘lub eta olmasligini aytdi. Orban nutqining tegishli qismi X ijtimoiy tarmog‘ida (sobiq Twitter) Vengriya hukumatining rasmiy vakili Zoltan Kovach tomonidan e’lon qilindi.
Orbanning aytishicha, Rossiyaning Ukrainaga nisbatan agressiyasini qabul qilish mumkin emas, ammo G‘arb davlatlari, uning fikricha, bu konfliktni hal qilishning noto‘g‘ri yo‘lini tanlagan. U Rossiya-Ukraina konflikti boshidanoq “globallashtirilgan” emas, balki “mahalliylashtirilgan” va “yakkalangan” bo‘lishi kerakligini aytdi.
Vengriya bosh vazirining ta’kidlashicha, G‘arbning bu urushdagi strategiyasi dastlab Ukraina jang qilib, g‘alaba qozonishi, Rossiya esa mag‘lub bo‘lishi, shundan so‘ng Moskvada muzokara olib borish mumkin bo‘lgan rahbariyat kelishi bo‘lgan.
“Strategiya shunday edi. Biz moliyalashtiramiz, ukrainaliklar esa jang qiladi va o‘ladi. Hozir biz bo‘lgan joyda, ukrainaliklar jang maydonida g‘alaba qozona olmasligi aniq. Oldingi chiziqda (bu konfliktga) yechim yo‘q. Ruslar yutqazmaydi. Moskvada hech qanday siyosiy o‘zgarishlar bo‘lmaydi. Bu haqiqat”, — deya xulosa qildi Orban.
