AQSHning Xitoyga qarshi urush boshlashi ehtimoli baholandi
NATOning Yevropadagi sobiq oliy qo‘mondoni, isteʼfodagi AQSH harbiy-dengiz kuchlari admiral Jeyms Stavridis Xitoy “taxminan 10 yil davomida” AQSH bilan ehtimoliy urushga tayyor bo‘lmasligini aytdi. Bu haqda Newsweek xabar berdi.
Janubiy Xitoy dengizidagi hududiy kelishmovchiliklar bo‘yicha keskinlik boshqa jahon urushiga aylanib ketishi mumkinmi, degan savolga u AQSH va uning mintaqaviy ittifoqchilariga Xitoy bilan ehtimoliy urushga tayyorgarlik ko‘rish uchun 10 yillik “imtiyozli davr” borligini aytdi.
AQSH va Xitoy munosabatlari Tayvan bo‘g‘ozining suvlarida Amerika va mintaqaviy ittifoqchilarning harbiy faoliyati tufayli keskinlashdi.
“Xitoy ulkan flot qurayotgan bo‘lsa ham, agressiv harakat qilsa ham, hali tayyor emas. Agar Xitoy bilan urushayotgan bo‘lsak, bu faqat AQSH va Xitoy o‘rtasida bo‘lmas edi. Bizning shartnoma bo‘yicha ittifoqchilarimiz borki, ular kelib, shunga o‘xshash harbiy kampaniyada qatnashishga qasamyod qilgan. Yaponiya, Janubiy Koreya, Filippin, Avstraliya, Yangi Zelandiya”, — dedi Stavridis.
NATO sobiq qo‘mondonining ta’kidlashicha, bu juda katta kuch.
“Mening fikrimcha, Xitoy taxminan 10 yil davomida AQSH bilan to‘qnashishga tayyor bo‘lmaydi. Shuning uchun bizda armiyamizni kuchaytirishimiz mumkin bo’lgan ma’lum bir davr bor. Shuningdek, munosabatlardagi keskinlikni yumshatish uchun diplomatiyadan va boshqa barcha vositalardan foydalanishga harakat qiling”, — dedi u.
Xitoy harbiy-dengiz kuchlarining iste’fodagi kontr-admirali Yan I ham Xitoy AQSH bilan urushga tayyor emasligini ta’kidlab, Xitoy armiyasi “qudratli va kuchli” bo‘lib, “turli ssenariylarga tayyor bo‘lishi” kerakligini aytdi.
