Falastin prezidenti Blinkenga Isroilning G‘azodagi “genotsid”ini qoraladi

Falastin prezidenti Mahmud Abbos 5-noyabr kuni AQSH davlat kotibi Entoni Blinken bilan uchrashuvda Isroilning G‘azo sektoridagi “genotsid”ini qoraladi. Bu haqda Al Arabia xabar berdi.

“G‘azo sektoridagi Falastin xalqimiz Isroil harbiy mashinasi tomonidan, xalqaro huquq tamoyillarini hisobga olmasdan, boshdan kechirgan genotsid va vayronagarchilikni ta’riflashga so‘zim yo‘q”, — dedi Abbos Blinken bilan uchrashuvda.

Siyosatchilar o‘rtasidagi uchrashuv bir soatdan kam davom etdi. Ramallohda bo‘lib o‘tgan uchrashuvning asosiy xulosalari quyidagilar:

• Abbos Blinkenga “zudlik bilan o‘t ochishni to‘xtatish” va G‘azo sektoriga gumanitar yordamning kirib kelishiga ruxsat berish zarurligini aytdi;
• Blinken AQSHning G‘azoga insonparvarlik yordami yetkazish, shuningdek, qamal qilingan zonada asosiy xizmatlarni tiklashni ta’minlash majburiyatini yana bir bor tasdiqladi;
• AQSH rasmiylariga ko‘ra, Blinken falastinliklar majburan ko‘chirilishi kerak emasligini aytgan va Vashington mustaqil Falastin davlatini barpo etish intilishlarini ro‘yobga chiqarish uchun harakat qilishga sodiq ekanini bildirgan;
• Blinken o‘t ochishni to‘xtatishga chaqirmagan;
• AQSH Davlat departamentining yuqori martabali mulozimining aytishicha, Blinken Abbosga Falastin “G‘azo sektorida keyingi voqealarda” markaziy rol o‘ynashi kerakligini aytgan.