HAMASga qarshi urush Isroil uchun necha pulga tushishi hisoblab chiqildi
Isroil Moliya vazirligi HAMAS bilan urush bir yilgacha davom etishi uchun qancha mablag‘ ketishini hisoblab chiqdi. Bu haqda Calcalist xabar berdi.
Ma’lum qilinishicha, Falastin guruhi bilan urush Isroilga 200 milliard shekel (51 milliard dollar)ga tushadi. Konflikt sakkiz oydan bir yilgacha davom etsa, G‘azo sektoridan tashqariga tarqalmasa va 350 ming zaxiradagi askar tez orada ishga kirishsa, shuncha mablag‘ kerak bo‘ladi.
Tegishli prognozni budjetga 160 milliard shekel (40,8 milliard dollar) tushgan koronavirus pandemiyasining oqibatlari bilan solishtirish mumkin. Pandemiya urush prognoziga nisbatan ikki yil davom etgan.
“Bundan tashqari, blokirovkalar tugagandan so‘ng, barcha to‘liq iqtisodiy faoliyatga qaytdi, sanoat, investitsiyalar, iste’mol va bandlik darajasi tezda tiklandi; 2021–2022-yillar uchun yalpi ichki mahsulot real ko‘rinishda 15 foizga o‘sdi”, — deyiladi xabarda.
Moliya vazirligi jangovar harakatlardan tiklanish sekin kechishini va urush tugashi bilan iqtisodiyot urushdan oldingi tendensiyalarga qaytmasligini ta’kidladi. Isroil xavfsizlik sektoriga eng ko‘p mablag‘ sarflashi kerakligi ko‘rsatilgan.
