Isroilning G‘azoga bergan zarbalarida 10 mingdan ortiq falastinlik halok bo‘ldi 

Isroil armiyasining G‘azo sektoriga uyushtirgan hujumlari oqibatida kamida 10 022 kishi halok bo‘ldi. Bu haqda Al-Jazeera xabar berdi.

Ma’lum qilinishicha, halok bo‘lganlar orasida 4104 nafar bola bor. G‘azo Sog‘liqni saqlash vazirligi ko‘plab qurbonlar vayronalar ostida qolib ketganini, Isroil qamali yonilg‘i, oziq-ovqat va elektr energiyasidan foydalanishga to‘sqinlik qilayotganini ma’lum qildi.

“O‘lganlar soni oshishi kutilmoqda, chunki vayronalar ostida kamida 2000 kishi qolmoqda. Muammo shundaki, og‘ir texnika va mexanizmlar yo‘qligi sababli yerdagi qutqaruv guruhlari bu jasadlarni vayronalar ostidan olib chiqishga qodir emas”, — dedi Al-Jazeera muxbiri Hani Mahmud.

Sog‘liqni saqlash vazirligi 7-oktyabr kuni boshlangan bombardimondan buyon yaralanganlar soni 25 ming 408 nafarga yetganini, Isroilning so‘nggi soatlarda 18 ta hujum uyushtirganini, 252 kishining qurbon bo‘lganini bildirdi.