Kim Chen In amaldorlarga falastinliklarni qo‘llab-quvvatlashni buyurdi — OAV
Shimoliy Koreya yetakchisi Kim Chen In rasmiylarga falastinliklarni qo‘llab-quvvatlashni buyurdi. Bu haqda The Wall Street Journal xabar berdi.
Ma’lum qilinishicha, KXDR yetakchisi Yaqin Sharqdagi jangari guruhlarga qurol sotish imkoniyatini ko‘rib chiqishi mumkin.
“Shimoliy Koreya o‘tmishda HAMASga tankka qarshi raketa otish moslamalarini sotgan va Pxenyan G‘azoga urush davrida ko‘proq qurol eksport qilishga urinishi ehtimoli bor”, — deyiladi xabarda.
Janubiy Koreya harbiylari 7-oktyabrdagi hujum suratlari va videolariga asoslanib, HAMAS Shimoliy Koreyaning turli qurollaridan foydalanganini iddao qiladi. Pxenyan bu ayblovlarni yolg‘on deya rad etgan.
Avvalroq Janubiy Koreya razvedkasi KXDR HAMASga Isroilga qarshi urushda “yordam” berishni rejalashtirayotgani haqida xabar bergandi. Shimoliy Koreya yetakchisi Kim Chen In yopiq eshiklar ortida o‘tkazilgan audit yig‘ilishida rasmiylarga Falastinga har tomonlama yordam ko‘rsatish choralarini ko‘rishni buyurgani bo‘yicha belgilar bor. Aynan qanday yordam haqida gap ketayotgani hozircha noma’lum.
